L’IPC baxó un 0,8 por cientu n’Asturies nel mes de xineru, anque la tasa interañal medra un 3,7

Los precios descendieron en xineru un 0,8 por cientu n’Asturies, una décima más que la media estatal, según l’INE. Mentes, la tasa interañal del país medró un 3,7 por cientu, aumentu más altu rexistráu nel Estáu xunto col de Castilla-La Mancha.
 
Estos datos del Institutu Nacional d’Estadística (INE) sitúa la media del crecimientu de la tasa interañal del Índiz de Precios de Consumu (IPC) nel Estáu nun 3,3 por cientu –lo que supón 4 décimas menos que n’Asturies– por mor de la xubida de la lluz. La tasa interañal del país ye la mayor del Estáu xunto cola de Castilla-La Mancha, mentes que Ceuta, con un 2,2 por cientu, ye la que presente un menor aumentu. No que respecta a la variación mensual del IPC, el mayor descensu tienlu Melilla, con un 1,4 por cientu, siendo la comunidá autónoma que rexistra una menor baxada Canarias, con un 0,3 por cientu.
 
La firma que más xubió nel mes de xineru n'Asturies foi la de vivienda, con un 3,2 por cientu respecto al mes anterior pol aumentu de los precios de la lletricidá y, en menor midida, del gas, gasóil pa calefacción y distribución d'agua. Tamién xubieron les bebíes alcohóliques y el tabacu un 2,3 por cientu, por mor fundamentalmente de la medra del preciu del tabacu. Per otru llau, la que más baxó foi la de vistíu y calzáu, con un descensu del 16,4 por cientu, dao que recueye l'efectu de les rebaxes d'iviernu, qu'empiecen nesta época.
 
El mes pasáu tamién crecieron n'Asturies los precios del tresporte (1,6 por cientu), xubida que s'esplica principalmente pol ascensu de los precios de los carburantes y llubricantes; l'apartáu d'otros (0,5 por cientu); hoteles, cafés y restoranes (0,3 por cientu); alimentos y bébores non alcohóliques (0,3 por cientu); menaxe (0,2 por cientu); y medicina (0,1 por cientu). Caltiénense estables con respecto al mes anterior la enseñanza y les comunicaciones. Mentes, l'ociu y la cultura baxó un 1,6 por cientu pola reducción de los precios de los viaxes organizaos.