Educación nun va convocar oposiciones pa Infantil y Primaria esti añu

La Conseyería d’Educación y Ciencia decidió nun convocar oposiciones esti añu pa ingresar nel cuerpu de mayestros d’Infantil y Primaria. Namái habrá concursu n’aquellos territorios del Estáu con llingua propia cooficial.
 
Asturies, polo tanto, sigui’l mesmu camín que tomaron de forma previa autonomíes como Murcia, La Rioja, Cantabria, Madrid y Castilla-La Mancha y nun va convocar oposiciones pal mes de xunu, como veníen reclamando los sindicatos. “L’Alministración educativa asturiana adoptó esta decisión en función de les perspectives que constataron nel resto d’España”, señala la conseyería nun comunicáu. “La mayoría de les comunidades autónomes descartaron la convocatoria de oposiciones, a excepción d’aquelles que tienen llingua propia y que los sos procesos selectivos suponen una criba inicial pa los aspirantes procedentes d’otres autonomíes”, añade, amosando otra vegada más el despreciu d’esti Gobiernu hacia la llingua del país, que nun reconoz como propia.
 
Educación reconoz tamién qu’una de les razones que lleven a nun realizar la convocatoria ya la presumible avalancha d’opositores procedentes d’otros puntos del Estáu. “Otro de los factores determinantes a la hora de tomar esta decisión radica nel coste eleváu que supondría una convocatoria nes circunstancies actuales. De fechu, puesto que nun van celebrase oposiciones na mayor parte de les comunidaes autónomes, l’asistencia ante una posible prueba n’Asturies sería mui elevada y les places a cubrir escases, porque ceñiríanse namái a cubrir la tasa de reposición, situada nun 30 por cientu”, aseguren dende la conseyería.
 
Otra manera, nesta xornada va conocese la totalidá de los territorios que van convocar oposiciones, puesto qu'hai dellos que tovía nun anunciaron la so decisión y el plazu pa tresmitilo al Ministeriu d'Educación zárrase güei.