El Tribunal Supremu desestima’l recursu del Gobiernu contra l’anulación del PXOU de Llanes

Una sentencia del Tribunal Supremu decidió tornar el recursu interpuestu pol Gobiernu y el Conceyu de Llanes contra’l fallu del Tribunal Superior de Xusticia d’Asturies qu’anulaba’l PXOU. El movimientu vecinal pide la dimisión de l’alcaldesa.
 
El Supremu decidió tornar tolos motivos de casación alegaos y declaró que "nun hai llugar" a los recursos de casación interpuestos pola Xunta de Compensación del Plan Parcial S.A.O.3 'La Portiella-Pancar', la Xunta de Compensación del Plan Parcial 'La Güertona', el Principáu d'Asturies, el Conceyu de Llanes, y la Xunta de Compensación del Plan Parcial "La Talá", contra la sentencia de la TSXA. Amás, el tribunal impuso a los recurrentes los costes xudiciales y comunicó a les partes que “nun cabe recursu ordinariu dalgún” contra’l so fallu.
 
El PXOU llaniscu foi anuláu pola Sala de lo Contencioso-Alministrativo del TSXA’l 11 d’abril del 2007 por nun axustase “al ordenamientu xurídicu” tres un recursu xudicial presentáu por Andecha Astur, formación política más activa contra’l plan urbanísticu. Nesa llucha tamién tomó parte l’Asociación de Vecinos y Amigos de Llanes (Avall) que güei, tres conocese la sentencia, reclamó la dimisión de l’alcaldesa, Dolores Álvarez, pola so participación y responsabilidá na anulación del PXOU y les “consecuencies económiques, urbanístiques y sociales tremendes qu’esta sentencia ocasiona al conceyu".
 
Avall recuerda que durante venti años alvirtió al entós alcalde de Llanes y güei delegáu del Gobiernu estatal n’Asturies, Antonio Trevín, de que les sos pretensiones "yeren contraries a la llei y que traerían consecuencies gravísimes a los ciudadanos llaniscos". El coleutivu, que tien interpuestu un recursu nel Tribunal Supremu qu’aborda aspectos más amplios del PXOU, considera que tolos ciudadanos de Llanes deben saber agora que’l so territoriu quedó ensin ordenación urbanística y que nel momentu en qu’Andecha Astur solicite la execución de sentencia "munches edificaciones” construides baxo esti plan “serán susceptibles de ser derribades".