Deva y Leoncia, los dos frangüesos procedentes del Pirinéu aragonés que foron soltaos nos Picos d’Europa dientro d’un proyeutu de reintrodución de la especie nel parque natural, tán adaptándose bien. Les aves llegaron a Asturies nel mes d’agostu.
 
La Fundación pa la Conservación del Frangüesu señaló güei que los dos exemplares tán evolucionando bien, con un comportamientu totalmente natural, y qu’éstos amuesen "una perfecta adaptación" al mediu que paez garantizar la so vida en llibertá”. Deva y Leoncia son los primeros frangüesos que vuelen per Asturies tres cincuenta años d’ausencia de la especie na Cordillera Cantábrica. La crianza, lliberación y siguimientu posterior de los dos animales ta enmarcao nel Proyeutu de Reintroducción del Frangüesu nos Picos d’Europa, executáu pola Fundación cola collaboración de los gobiernos d’Asturies y d’Aragón, Ministerio de Medio Ambiente y Mediu Rural y Marín, y la Fundación Biodiversidá.
 
Nestos momentos, les dos aves alcuéntrense nuna fase dispersiva que carauterízase pola esploración del territoriu nel que viven. Según señalen dende la Fundación pa la Conservación del Frangüesu, Deva y Leoncia desplazáronse hasta 30 kilómetros dende’l puntu de suelta, cerca de los Llagos de Cuadonga. Asina, pudieron ser vistes dende la zona del Cares o la Sierra del Cuera.