El Musel dulda qué facer tres el fallu de l’Audiencia Nacional sobre l’esmonte l’Alto Aboño

Recurrir la sentencia o ellaborar un plan nuevu. Ésa ye la dulda que tien l’Autoridá Portuaria de Xixón tres el fallu de l’Audiencia Nacional que paraliza l’esmonte l’Alto Aboño y que los sos responsables van consultar cola Abogacía del Estáu.
 
Fernández Ménendez Rexach, presidente de l’Autoridá Portuaria de Xixón, informó ayeri al conseyu d’alministración del Puertu de la sentencia qu’anula 'l plan d'usu d'espacios portuarios d'El Musel y señaló que van a estudiala con detalle pa realizar una evaluación del fallu. Al empar, el Puertu de Xixón va establecer un periodu de consultes cola Abogacía del Estáu y con Puertos del Estáu "pa tomar les decisiones más convenientes pa l'actividá portuaria".
 
Mentes, el Conceyu de Carreño y l’Asociación de Vecinos de Xibares ‘El Tranqueru’, muestren la so satisfaición pola sentencia que paraliza l’esmonte, al igual que delles formaciones polítiques, como IX, PP y UNA. L’agrupación de Carreño del partíu nacionalista va más allá y reclama a El Musel que renuncie definitivamente a la execución de la obra, al mesmu tiempu que solicita al Conceyu de Carreño qu’esixa indemnizaciones a l’Autoridá Portuaria de Xixón.
 
"Ofrecemos el nuesu apoyu a los vecinos y vecines qu'anuncien que van pidir indemnizaciones y compensaciones polos daños provocaos al patrimoniu etnográficu, históricu, artísticu y natural, asina poles espropiaciones forzoses y derribu de viviendes", señaló UNA Carreño, pa quien lo asocedíu con esti asuntu “en cualquier país normal significaría la dimisión de los responsables políticos”.