Ana Rosa Migoya, conseyera d’Alministraciones Públiques, nun quixo falar na sesión plenaria de la Xunta Xeneral sobre Riopedre y Otero. Por contra, si fixo referencia a Renedo, tercer persona en prisión pol casu de corrupción n’alministración.
 
La tamién vocera del Gobiernu garróse al secretu de sumariu pa nun referise a José Luis Iglesias Riopedre, ex conseyeru d’Educación y Ciencia, y María Jesús Otero, ex direutora de Centros y Planificación de la conseyería y númberu 2 de Riopedre, na rempuesta a una interpelación del PP pola ‘Operación Marea’. No que respecta a Marta Renedo, ex xefa de serviciu de la conseyería d’Alministraciones Públiques, Migoya señaló que foi’l Gobiernu d’Asturies quién detectó “irregularidaes” y les punxo en conocimientu de la xusticia. Amás, la conseyera aseguró que los controles del Principáu “furrulen” y que lo que falló “foi una persona”.
 
Les rempuestes de Migoya nun sirvieron al PP, que recordó a la conseyera la gravedá d’un casu que ta “avergoñando” a tolos asturianos. Tamién faló del asuntu’l diputáu del Grupu Mistu, Roberto Colunga (Bloque por Asturies), que señaló que "el clientelismu ye una de les causas fundamentales de la corrupción". Colunga pidió a la Xunta Xeneral que trabaye pa "depurar les responsabilidaes polítiques" ensin bloquear los sistemas de control.
 
Pela so parte, Jesús Iglesias, d’IX-Verdes, argumentó que’l secretu de sumariu "llimita" les posibilidaes d’información y qu’hai que respetar el marcu llegal. “Eso reduz les posibilidades d’actuación d’esta Cámara", continuó, pa dempués añadir que’l PP utiliza esta circunstancia pa moverse na "especulación".
  
Hai que señalar que nesta sesión plenaria de la Xunta Xeneral, que yá se preveía polémica, nun tuvieron presentes Vicente Álvarez Areces, presidente del Gobiernu, y Javier Fernández, candidatu nacional del PSOE a les eleiciones del 22 de mayu.