El comunicáu d’ETA crea división ente los llectores d’Asturies.com

El Conceyu Abiertu qu’entrugaba sobre’l comunicáu d’ETA del 11 de xineru provocó división ente los nuesos llectores. Un 33 por cientu piensen qu’ésti ye positivu y busca la paz, mentes qu’un 30 por cientu camienten que la banda tien otres intenciones.
 
Nesta selmana que diose a conocer el proyeutu nuevu de la esquierda abertzales, Sortu, zarramos el Conceyu Abiertu qu’entrugaba a los nuesos llectores sobre’l significáu del comunicáu d’ETA del 10 de xineru nel que la banda anunciaba un altu’l fueu “permanente, xeneral y verificable”. Un 33 por cientu señaló qu’esti “ye positivu y distintu a anteriores, porque’l compromisu de paz ye firme”, mentes qu’un 30 por cientu optó por señalar “que ye negativu, namás que busquen rearmase otra vuelta”.
 
L’axustada que foi la votación nesta ocasión queda nidio tres comprobar que’l 25 por cientu de los usuarios optaron por otra opción: “ye lo que-yos queda; tán acabaos”. Más atrás, con un 13 por cientos de votos, queda la rempuesta “ye un pasu, anque nun se debe ceder a negociaciones”.
 
Mañana, los usuarios d’Asturies.com van poder votar una encuesta nueva na seición Conceyu Abiertu.