Migoya nun va comparecer na Xunta pola ‘Operación Marea’

El PSOE y IX refugaron la comparecencia d’Ana Rosa Migoya na comisión d’Alministraciones pa dar esplicaciones pol casu de corrupción que mantién en prisión a José Luis Iglesias Riopedre. Los partíos nel Gobiernu escúdense nel secretu de sumariu.
 
La intervención de la conseyera d’Alministraciones Públiques, reclamada dende les files del Bloque por Asturies y el PP, nun va producise tres la negativa de los dos socios de Gobiernu. PSOE y IX faen referencia a un informe oral de los servicios xurídicos de la Xunta Xeneral qu’advierte de la posibilidá de caer en delitu si nesa comparecencia revela detalles del casu pol secretu de sumariu decretáu pola xueza que lleva la instrucción, Ana López Pandiella.
 
El PP criticó ayeri la postura de los dos partíos nel Gobiernu nuna rueda de prensa y advirtió de que éstos “nun puen amparase nel secretu de sumariu pa nun dar esplicaciones polítiques que los grupos parlamentarios tenemos derechu a conocer”, en pallabres del diputáu José Agustín Cuevas-Mons, que taba acompañáu por Ramón García Cañal. El PP, al igual que’l Bloque, reclamó tamién la comparecencia d’Herminio Sastre, conseyeru d’Educación y Ciencia actual, amás d’otros cargos, anque’l llunes refugó la del presidente, Vicente Álvarez Areces, que solicitara’l partíu nacionalista. Nun primer momentu, los dos diputaos populares negaron saber dalgo d’esa votación sobre la intervención del xefe del Executivu na Xunta Xeneral, anque avanzada la rueda de prensa reconocieron qu’esti refugu prodúxose por venir dende’l Grupu Mestu, formáu por un diputáu, Roberto Colunga (Bloque), del que rechacen toles sos proposiciones por consideralu un ‘tránsfuga’ tres la so salida del Gobiernu.
 
La ‘Operación Marea’ ye’l nome de trama presunta de corrupción nal alministración asturiana que mantién en prisión a José Luis Iglesias Riopedre, ex conseyeru d’Educación y Ciencia; María Jesús Otero, ex direutora de Centros y Planificación de la conseyería y númberu 2 de Riopedre; y Marta Renedo, ex xefa de serviciu de la conseyería d’Alministraciones Públiques.