La “pita” de la Xunta pola Defensa de la Llingua volvió asistir a un actu d’Areces

La perconocida “pita” de la Xunta pola Defensa de la Llingua Asturiana volvió apaecer ayer nun actu del presidente asturianu, Álvarez Areces. Nesta ocasión la protesta desarrollóse nun actu de presentación d’un llibru n’Uviéu. Hasta ehi desplazáronse dellos militantes de la XDLLA con cartelos qu’acusaben al gobiernu asturianu de “marxinar y reprimir la lingua asturiana”.

Según la nota de la Xunta pola Defensa de la Llingua Asturiana “la Pita y los compañeros y compañeres de la Xunta que l’acompañaben ficieron por recordá-y al presidente les sos responsablidaes na marxinación de derechos llingüísticos fundamentales n’Asturies”.

Dende la XDLLA tamién señalen que “l’exerciciu de la llibertá d’espresión y de crítica política foi severamente condicionáu por un despliegue policial espectacular, con decenes d’antidisturbios incluyíos, que ficieron lo posible por evitar semeyes del presidente xunto a les pancartes reivindicatives. La policía identificó a dellos compañeros y, incluso, sacaron a la cai pa identificar a un matrimoniu d’amigos del autor qu’asistieran a la presentación”.