Un incendiu arrasa la nave d’una cooperativa de Navelgas

La fábrica de Chacinería Asturiana en Navelgas quedó ayeri destrozada por un incendió que principió a les 3 la madrugada y que Bomberos d’Asturies nun pudo dar por apagáu hasta 15 hores depués del so ainiciu. La empresa, una cooperativa con mercáu n’Asturies y en dellos puntos del Estáu, daba empléu a 12 trabayadores na so planta.
 
Anque tovía nun se conocen les causes del incendiu, les primeres hipótesis apunten a un posible cortocircuitu. La rapidez cola que se propagaron les llames fixo inútil l’actuación de los bomberos, que namái pudieron atacar el fueu dende l’esterior. Tol so esfuerzu centróse en que l’incendiu nun s’averase a la gasolinera cercana a la planta.
 
La nave de Navelgas contaba con una superficie de 2.500 metros cuadraos y contenía, amás de maquinaria pa la fabricación d’embutíos y cámares frigorífiques, una cantidá importante d’alimentos. Les perdes económiques totales podíen situase alredor de los 3 millones d’euros, lo que dexa nuna situación complicada a esta empresa de Tinéu, una de les más veteranes del seutor n’Asturies.