Preséntase’l dvd “Música Tradicional en Conceyu L.lena”

El Conceyu de L.lena presenta (presentación anulada pol temporal) esti vienres a les 19:00 hores nel Teatru Vital Aza de La Pola’l dvd “Música Tradicional en conceyu L.lena”. Esti dvd ye’l resultáu de la grabación n’abril del 2007 del conciertu-presentación del discu del mesmu nome, del que formen parte temes recoyíos nel Archivu de Tradición Oral del músicu y etnógrafu Xosé “Ambás”.

Esi día axuntáronse nel escenariu del teatru vecines del conceyu que fueron faciendo un repasu, de la mano de Xosé Antón Fernández “Ambás”, per tolos cantares de zones como Chanos, Piñera, Payares, La Romía, Zurea, Carabanzo, etc. nun actu nel que se quixo facer un homenaxe a tola xente que sigue guardando y tresmitiendo la cultura d’esti conceyu.

Nesta presentación van participar el Conceyal de Cultura y Política llingüística David Suárez, el Teniente d’Alcalde Xosé Agripino Pérez, amás del propiu Xosé Antón Fernández “Ambás”. La intención del Conceyu ye que’l dvd sía un regalu institucional p’asina dar a conocer la cultura del conceyu.