El PP opina que la trama de Riopedre “podría” espardise en Xixón

El conceyal del PP de Xixón Manuel Pecharromán señaló que varies persones de l’Agrupación Socialista de Xixón calteníen vínculos coles empreses implicaes na trama de supuestes axudicaciones illegales.

Pecharromán, en rueda prensa nel Conceyu, remarcó qu'hai "demasiaes vinculaciones" ente les empreses implicaes na trama y el PSOE xixonés, dao que tienen ente'l so personal a familiares, según él, de dirixentes como la muyer de Sariego, y tamién el fíu del ex conceyal Manuel Muruáis, "que trabayó n'Almacenes Pumarín y nesti momentu ta n'otra empresa cola que tamién contrata l'Alministración llocal", dixo.  
  
Por too ello, indicó qu'esta trama podría tener "una importante rama en Xixón". Nesti sen, señaló que'l so partíu yá venía barruntando d'un númberu de compres escomanaes, "tanto pol so númberu como pol so importe", a Almacenes Pumarín, per parte del Conceyu y la Conseyería d'Educación.
  
Coles mesmes, apuntó que'l PP va collaborar cola Xusticia pa resolver "esti grave casu". "Vamos entregar tola documentación y les factures, qu'hasta agora yeren sospeches, pero qu'agora puen tornar nun nuevu casu de corrupción, que se suma a les solombres nel urbanismu xixonés, col casu Cabueñes'", repitió.
  
Publicar les contrataciones
Amás, esixó a l'alcaldesa, Paz Fernández Felgueroso, al  secretariu xeneral del PSOE de Xixón, José Manuel Sariegu, y al conceyal de Facienda y candidatu a l'Alcaldía, Santiago Martínez Argüelles, que faigan  públicu, con calter inmediatu, l'importe total y detalláu de les compres y contrataciones del Conceyu, los sos organismos autónomos y toles empreses municipales, coles empreses implicaes na trama.
  
"Nós nun refugamos pidir dimisiones a midida que se comprueben los datos", añadió antes d'añadir que si tanto presumen de tresparencia, "agora tienen un bon motivu pa practicala".