'Pan y Toros' pa conmemorar el 200 aniversariu de Xovellanos

La zarzuela 'Pan y Toros' de Francisco Asenjo Barbieri, va conmemorar el próximu 6 de febreru en Xixón el 200 aniversariu de la muerte de Gaspar Melchor de Xovellanos, insigne escritor, xurista y políticu ilustráu asturianu.

El teatru que lleva'l so nome d'esta población asturiana va acoyer asina ún de los actos centrales de la programación sobre la figura d'esti pensador y intelectual nuna producción singular diseñada por Ignacio García y con un elencu encabezáu pola mezzosoprano María José Montiel.
  
Na presentación esti martes del espectáculu, promovíu pola Fundación Ana María Iriarte, y celebrada na sede madrilana de la Sociedá Xeneral d'Autores y Editores (SGAE), Emilio Casares, director del Institutu Complutense de Ciencies Musicales (Iccmu) recordó la resonancia de Xovellanos, "a quien calificó de figura fundamental na política y cultura española".

"Un mitu"  
Al respecto de 'Pan y Toros', Casares señaló que se trata d'un mitu de la "nuesa lírica" y qu'esta obra "nada tien que ver col denomináu xéneru chicu" sinón que se trata d'una zarzuela grande" que trata temes y personaxes históricos, como la situación na España de finales del XVIII col protagonismu de Xovellanos.
  
Trátase d'una música llena de garbu y ritmu, “mui española”, ye la "sustancia de la zarzuela", repostió Casares, que resaltó la recuperación que se fizo pa esta puesta semiescénica d'un "dúo virtuosísimu y operísticu" del orixinal.
  
Pela so parte, el mozu director d'escena Ignacio García calcó na "oportunidá xeneracional" que supón pa él tratar esta producción qu'ofrez "una música escepcional", que va interpretar la Orquesta Sinfónica Ciudá de Xixón dirixida pol maestru Oliver Díaz.
  
Otros actos
A lo último, el conceyal de Cultura del Conceyu de Xixón, Justo Villabrille, refirióse a otros eventos que van completar el denomináu Añu Jovellanos nesta población asturiana: una gran esposición sobre la figura d'esti políticu y intelectual y la ilustración del XVIII, que va contar con obres del Muséu del Prado; un Congresu Internacional que pretende ser "un emburrión" pa que Xovellanos seya más conocíu nel mundu anglosaxón (publicóse la primer biografía n'inglés); y una serie de TVE con guión de Juan Luis Cebrián que podrá vese a lo llargo d'esti añu.