La Tarrancha prepara una nueva temporada de conciertos

La Tarrancha vuelve a les andaes. La banda de ska-fusión vien d’abrir la contratación pa la primavera-branu y anunció que’l so próximu conciertu va ser el domingu 30 de xineru na gala “Xixón fala n’asturianu”.

Soníos xamaicanos, folkis, llatinos… son dalgunos de los estilos que percuerre’l “Mecigayu ska”, etiqueta cola que La Tarrancha define’l so eclécticu soníu. Un son personal que llantaron per abondos escenarios de dientro y fuera d’Asturies y rexistraron nel single “Exit-encia”, la maqueta “QLT?” y el discu “Ö-3-3”.

Pesie a los nuevos cambios de formación, la banda sigue n’activo y ta acabantes d’abrir el períodu de contratación pa la primavera-branu d’esti 2011. La so primer puesta n’escena va ser el próximu domingu 30 de xineru dientro de la gala “Xixón fala n’asturianu”. Nella, van actuar tamién Alfredo González, Tuenda, Anabel Santiago y el monologuista Carlos Alba “Cellero”.

Creative Commons
Otru de los aspectos sorrayaos por La Tarrancha ye’l so compromisu cola llibre difusión de la música. D’esti mou, el grupu tien les sos composiciones rexistraes baxo llicencia Creative Commons y caltién rellación nenguna cola SGAE polo que, como indica la banda, “los contratantes tán exentos de pagar el dichosu tantu por cientu a la SGAE”.