UNA critica les "subvenciones encubiertes" en Vivienda

El voceru de vivienda d’UNA, Daniel Fernández, indicó que tán cumpliéndose les previsiones de les consecuencies de les polítiques de vivienda n'Asturies: baxar la edificación y xubir los precios, en cuenta d’axustalos.

Dende UNA diz que'l pactu robláu ente la Conseyería de Vivienda y la patronal de la construcción yera una mera escusa pa caltener l'actividá del sector, en llugar d'aguiyar la construcción al traviés del fomentu de la obra nueva de promoción pública.
  
Pa Fernández la política social de vivienda d'IX "nun ye otra cosa que subvenciones tapaes pa promotores y constructores, que pueden permitise’l luxu d'aumentar precios y al empar axusten a la baxa la ufierta de viviendes".
  
Asina, llamenta qu'estos "van poder dar salida al so stock gracies a les compres ya iniciatives públiques como les subvenciones a alquisición de vivienda, que namás tendríen de ser pa promoción pública y que la Conseyería amplió a promociones orixinariamente privaes y siempres pa construcción nueva".
  
Mercáu protexíu
Por tou ello UNA considera que nunca se quixo facilitar l'accesu a la vivienda de forma directa o indirecta, sinón xenerar un mercáu protexíu ante la crisis inmobiliaria por que nun se fundieren los precios nel sector priváu" y estima que l'oxetivu "llogróse en demasía".
  
Pa la formación, el preciu abusivu de la vivienda esixe tomar midíes pa sacar al mercáu tola vivienda vacía posible, al traviés d'una fiscalidá que castigue caltener los pisos desocupaos y escaecese de la política de "guetos de mileuristas" nes contornes de les ciudaes, mientres se caltienen los centros urbanos con un grau de desocupación “inadmitible".