Incertidume nel profesoráu de llingua asturiana tres una sentencia del Tribunal Supremu

Una sentencia reciente del Tribunal Supremu declara “contraria a derechu” la existencia de les “plantiyes funcionales”, categoría na que la Conseyería d’Educación engloba a los docentes d’asturianu y gallego-asturiano. Esti fallu supón que’l colectivu tendría que pasar por llei a formar parte de la “plantiya orgánica”, na que s’alcuentren el restu del profesoráu. La Conseyería entá nun dio anuncia de cómo va cumplir la sentencia.

La posible inclusión de los profesores y maestros nes plantiyes orgániques de los centros podría llevar a la creación de la especialidá de llingua asturiana nel cuerpu de maestros y de profesores de secundaria, lo que supondría que los aspirantes que superasen un procesu selectivu asemeyau al de les otres especialidaes formaríen parte de la plantiya de funcionarios docentes. Anguaño toles places cúbrense con funcionarios interinos. Dende la Conseyería d’Educación nun se dio anuncia de la posibilidá de creación de la especialida de llingua asturiana, polo qu’anguaño desconozse que fórmula va utilizar el Gobiernu asturianu p’acatar la sentencia del Tribunal Supremu.

Sicasí inda ta too nel aire, yá que según anuncia’l sindicatu FETE-UGT, énte “la posible illegalidá na que’incurriría, al establecer en plantiya orgánica una especialidá non creada” la Conseyería d’Educación “da marcha atrás nes sos intenciones d’incluyir la Llingua Asturiana en plantilla orgánica”.

Pa SUATEA esta sentencia “trátase d’un pasu fundamental pa garantizar y dignificar la presencia de la nuestra llingua nel sistema educativu asturianu” anque denuncia “qu’en nengún momentu l’alministración facilitó nenguna información de cómo tien camentao aplicar la sentencia, nin los criterios que van siguir pa sacar les places d’asturianu”.

Mientres pa CC.OO “la normalización de la llingua debería pasar, amás de pola dotación de las places, pola creación de la especialidad de Llingua Asturiana y Gallego-Asturiano nos cuerpos de Maestros y Profesores d’Enseñanza Secundaria y pola convocatoria d’oposiciones, ufiertándose’l mayor númberu de places posibles, pa que los interinos de Llingua Asturiana puedan acceder a la función docente nes mesmes condiciones que’l restu d’especialidaes”.

Énte esta situación, esti vienres 6 de febreru va celebrase a les siete de la tarde nel salón d’actos del IES Alfonso II d’Uviéu una asamblea de profesores interinos de Llingua Asturiana d’Enseñanza Primaria y Secundaria pa valorar les consecuencies que sobre esti colectivu de trabayadores de la enseñanza va a tener la nueva catalogación de puestos de trabayu en Primaria.