Dimiten Arias-Cachero y Manjón nel so cargu de conceyales

El conceyal Non Adscritu nel Conceyu d'Uviéu y militante del PP, José Suárez Arias-Cachero, anunció esti llunes que va arrenunciar a la so acta de conceyal y va dase de baxa del partíu.

Tamién va facelo la conceyala 'popular' Carmen Manjón. Dambos amosaron públicamente'l so sofitu a la candidatura de Francisco Álvararez-Cascos, en cuenta de la so compañera nes consistoriales, Isabel Pérez-Espinosa.
  
En declaraciones a los periodistes, antes de facelo formalmente na vez de ruegos y entrugues, Arias-Cachero dixo que van presentar formalmente "en mano" la so dimisión al alcalde d'Uviéu, Gabino de Lorenzo, cuando ésti allegue a un plenu municipal y mentanto van abstenese de les sos funciones de conceyal.
  
Amás, unvió una carta al presidente del PP, Mariano Rajoy, na qu'en refiriéndose a una Asturies "güérfana de proyectu y de lideralgu", esplica que dexa'l PP porque "nin cumple les sos propies riegles nin ye coherente colos valores democráticos y civiles que tienen de caracterizar a los partíos lliberales y de centru derecha".
 
"Dexo'l PP en desalcuerdu cola so decisión d'imponer a Isabel Pérez-espinosa como candidata a la presidencia del Principáu d'Asturies ensin dar la oportunidá a los afiliaos asturianos por que pronunciáramos ente la so candidatura y la de Francisco Alvarez-Cascos", escribe.
  
Despreciu a los asturianos
Na so opinión, la decisión de la cúpula del PP ye "un despreciu intolerable escontra los asturianos" y "una burlla a los miles d'afiliaos populares que roblaron el pidimientu de qu'Álvarez-Cascos fuera'l candidatu". Amás, pal conceyal, la designación de Pérez-Espinosa "ignora los sondeos" y constitúi una barbaridá" que s'executa "con alevosía".
  
"Paezme increíble que 28 años dempués tenga qu'abandonar el partíu del mio padre solu por pensar distintu, por defender a un líder históricu del partíu y por pidir que se sigan les regles del xuegu tantu polítiques como llegales dientro del Partíu Popular", señala n'otru fragmentu d'un escritu que conclúi parafrasiando a Benjamin Franklin: "Aquellos qu'arrenuncien a la so llibertá esencial p'adquirir una pequena seguridá temporal nun son merecedores nin de la llibertá nin de la seguridá".
  
Cachero dixo que la so baxa nel PP súmase a la d'otros 140 afiliaos d'Uviéu y que la so decisión de dimitir agora respuende a qu'el d'esti llunes ye'l primer plenu tres la marxinación" d'Álvarez-Cascos, como candidatu "que queríen los afiliaos y los votantes del PP". Ente les baxes, apuntó, hai miembros de la xunta local d'Uviéu y representantes d'instituciones como'l Muséu de Belles Artes.