Con retrasu sobre la primer fecha prevista, el procesu de construcción d’una alternativa asturianista y d’izquierda sigue en marcha. El portavoz del Bloque por Asturies, Rafael Palacios, comenta a ASTURIES.COM dalgunos aspectos.

“El proyectu ta a puntu de presentar el primer avance, col oxetivu de que s’incorporen persones, independientes y organizaciones”, comenta Palacios sobre los movimientos políticos qu’entamaron n’ochobre del 2010 y que tien como actores principales al Bloque por Asturies y a Unidá Nacionalista Asturiana (UNA).

Valledor yera’l nome d’ún de los posibles candidatos pa esti procesu; sicasí, el voceru del BA esclaria que “el candidatu nun ta decidíu” y añade que “ta trabayándose pa construir una alternativa dende les organizaciones, dende los independientes, y non dende una persona en concreto”.

“Había una primera intención de presentalo a finales del 2010, pero tamos yá nel momentu cercanu a la conclusión de la primer fase”, comenta Palacios sobre la fecha de presentación pública del proyectu. Amás, argumenta que nun se tán “agobiando” porque l’oxetivu ye dar “pasos firmes, sólidos y seguros”.

Federación d’organizaciones
“Esti ye un proyectu que tien una primera cita en mayu de 2011, pero la voluntá ye de construir un proyectu a mediu y llargu plazu col oxetivu de fortalecer y responder a esi esfuerzu por trabayar la unidá”, señala l’asturianista sobre un procesu que, tres de la cita electoral, nagua por constituyir una federación d’organizaciones.

El calter abiertu del procesu ye otru de los aspectos destacaos por Palacios: “dende’l primer momentu planteamos qu’esto taba abiertu a la incorporación de persones y organizaciones que quieran falar”, matiza qu’esto ye posible cuando s’amuesa “voluntá de participar y falar”, y sorraya que’l procesu “nun se va presentar de forma zarrada y ta abiertu”.

Segunda fase
Tres de la primer presentación del proyectu, entamaría lo que’l portavoz del Bloque por Asturies denominó como “segunda fase”. “A partir d’ehí lo que queremos ye empezar a trabayar llistes completes y conceyos, a valorar programa y facelo de la forma más plural y horizontal posible”.

A lo último, Palacios llamó a la “xenerosidá y responsabilidá necesaria nestos momentos más que nunca pa construir dende les instituciones y dende la cai una alternativa firme”.