Rajoy, "convencíu" de que'l PP va ganar n'Asturies

El presidente del PP, Mariano Rajoy, aseguró que dientro del partíu tán "bien arguyosos" de la candidata p'Asturies, Isabel Pérez-Espinosa, cola que tán "absolutamente convencíos" de que van ganar nes próximes elecciones.

"Yo nesti asuntu yá toi nel futuru. Lo único que m'importa nesti momentu ye dicir que tamos bien arguyosos y bien contentos de la nuesa candidata pol PP d'Asturies", dixo en declaraciones a los medios na sede del Parlamentu Européu en Bruxeles. Rajoy calcó en que nel PP tán "absolutamente convencíos" de que'l partíu "va ganar" les elecciones n'Asturies.
  
El dirixente 'popular' destacó qu’Asturies tien "emburrie" y "potencial" y un llugar nel que munchos mozos "tienen que marchar p'atopar un empléu”. "Ési ye'l retu y tamos convencíos de que nun momentu onde la xestión ye capital, el Partíu Popular va merecer la confianza de los asturianos. Lo demás ye historia pasada", acabó.
  
Rajoy viaxó a Bruxeles pa participar nun homenaxe a la ex comisaria de Tresporte y ex ministra d'Agricultura Loyola de Palacio, nel que la Eurocámara va dedicar una de les sos sales a la política desapaecida. Al actu asiste la plana mayor del Partíu Popular, incluyíu l'ex presidente del Gobiernu José María Aznar y la presidenta de la Comunidá de Madrid, Esperanza Aguirre.
  
Cascos tamién tenía previsto asistir al homenaxe, pero a lo último canceló la so presencia. Una decisión que Rajoy nun quiso valorar a los periodistes que-y preguntaron si a Cascos diben da-y una buena recepción.