Bruxeles pide retrasar la edá de xubilación

La Comisión Europea pidió esti miércoles a tolos Estaos miembros retrasar la edá de xubilación y acabar coles prexubilaciones pa meyorar la sostenibilidá de los sistemes de pensiones.

Bruxeles reclama tamién siguir cola consolidación fiscal y acelerar la reforma del mercáu llaboral y la reestructuración del sector financieru. Éstes son les principales prioridaes que los Gobiernos de la UE tendrán que siguir a la hora d'ellaborar los sos presupuestos y los sos planes de reformes pal añu del 2012.

Trátase de la primer vez que se pon en marcha'l denomináu 'semestre' européu, col oxetivu de que Bruxeles revise los presupuestos nacionales antes de la so aprobación parlamentaria pa prevenir nuevos problemes de déficit y de diverxencies de competitividá qu'agraven la crisis de deuda.
  
"Una reforma eficaz de los sistemes de pensiones tien qu'incluyir polo menos los siguientes elementos: un aumentu de la edá de xubilación, añadíu a la esperanza de vida; una reducción de los sistemes de prexubilaciones y incentivos pa contratar a trabayadores mayores, asina como formación continua", dixo'l comisariu d'Asuntos Económicos, Olli Rehn, nun discursu.
  
Rehn esplicó que munchos Estaos miembros yá realizaron reformes importantes de los sos sistemes de pensiones y "otros tán faciéndose, dende Grecia hasta España". "Pero ye esencial que tolos Estaos miembros actúen pa garantizar la sostenibilidá y adecuación de los sos sistemes de pensiones pa los próximos años", resaltó.
  
Reformes nel mercáu llaboral
La Comisión Europea reclama amás más reformes nel mercáu llaboral pa baxar el nivel de paru. La prioridá tien que ser, según Bruxeles, condicionar les prestaciones por desempléu a la busca de trabayu y al siguimientu de cursos de formación y aumentar la flexibilidá. Pa los países con déficit por cuenta corriente, como España, Rehn encamienta meyorar el sistema fixación de salarios pa evitar perder competitividá.
  
L'Executivu comunitariu considera amás que tolos Estaos miembros tienen qu'empezar o siguir esti añu cola consolidación fiscal, porque se trata d'un "prerrequisitu pa la estabilidá y el crecimientu, y baxar el déficit polo menos más d'un 0,5% del PIB en términos estructurales, según dixo'l comisariu d'Asuntos Económicos.
  
Pa ello, la Comisión defende recortar primero'l gastu, nun siendo'l dedicáu a educación y a I+D. Si resulta necesario aumentar los impuestos, Rehn aconseyó elevar primero los indirectos, como l'IVA, y ampliar la base imponible primero que subilos.
  
Pa los países con superávit por cuenta corriente, Bruxeles solicita identificar y resolver los problemes que contienen la demanda interna, por exemplu, la falta de competencia nel sector servicios.
  
A lo último, el comisariu d'Asuntos Económicos reclamó a los países que "aceleren la reestructuración de los bancos basándose na nueva ronda de pruebes d'estrés que se va llevar a cabu nos próximos meses" y que refuercen la so base de capital.
  
"Ye esencial un altu nivel d'ambición y una rápida aplicación (de les reformes). Esto échase en falta con demasiada frecuencia y por eso pido a los Estaos miembros que por favor usen los programes de reformes nacionales como un instrumentu pa faer avanzar el debate y les decisiones sobre les reformes necesaries", acabó Rehn.