K-Nalón, Músicos pola Oficialidá, La Bandina y Esther Fonseca finalistes a meyor cantar n'asturianu nos Premios de la Música

|

La XIII edición de los Premios de la Música yá tien finalistes. Ente les distintes categoríes d'estos premios, hai una que centra abondo l'atención n'Asturies, al meyor cantar n'asturianu. Na edición de 2009 son cuatro los grupos los finalistes, cuatro bandes con estilos diferentes que representen bien la variedá estilística la música de fecha n'asturianu. Per otru llau, nun hai más presencia de grupos asturianos nel restu de categoríes.
 
Los Premios de la Música entámalos l'Academia de las Artes y las Ciencias de la Música, entidá fundada pola Sociedá Xeneral d'Autores y Editores (SGAE) y Artistes, Intérpretes y Executantes, Sociedá de Xestión d'España (AIE). Na edición d'anguaño, y al traviés del procesu internu de votu, los finalistes na categoría al meyor cantar n'asturianu son K-Nalón col cantar "Dixebra" del so cd "Conciencia Llibre", La Bandina col tema "Valse coxu"cantáu por Alicia ÁLvarez (Pauline en la playa), el colectivu Músicos pola Oficialidá, que d'unos años a esta parte reúnese una vez al añu pa facer un tema de sofitu a la oficialidá, en 2008 esti mecigayu de músicos asturianos ficieron el tema "Garra la Palabra". Finalmente completa la nómina de finalistes Esther Fonseca, col cantar "Negra", tema incluyíu nel so últimu discu en solitariu "Viaxe".
 
La presencia de grupos asturianos nos premios d'esti añu queda restrinxida a la categoría del cantar n'asturianu. Con too y con ello, sí hai que mencionar la nominación del músicu alemán,anque con muncha rellación con Asturies -por exemplu acaba de producir el discu de Los Ciquitrinos- Andreas Prittwitz, que ta nomináu na categoría Meyor interprete de Música Clásica col discu "Looking Back over the Renaissance". Los ganadores d'esta edición de los premios van conocese'l próximu 12 de marzu nuna gala que se va celebrar en Badaxoz.

Contador Estadistiques