David M. Rivas publica un ensayu sobre la industria xixonesa

L’economista xixonés David M. Rivas vien de publicar “Incompetentes y autoritarios. La industria de Xixón dende l'autarquía al desmantelamientu", un ensayu sobre la evolución de la industria xixonesa ente 1940 y 1990.

“Si tuviéramos que buscar dalguna alterística que desplique la evolución de la industria de Xixón pente l’autarquia de los cuarenta y cincuenta ya’l desmantelamientu de los ochenta y noventa, podríamos alcontrala na incompetencia y dexadez de la burguesía llocal y asturiana”, ye una de les afirmaciones que Rivas fai nesti ensayu editáu por espublizastur.
 
Per otru llau, la obra vien acompañada d’un llibretu con semeyes del fotoperiodista xixonés Xurde Margaride. Tamién participó l’académicu de la llingua Roberto González-Quevedo, que fai’l prólogu a la obra.
 
L’autor
David M. Rivas (Xixón, 1957) ye Doctor n'Economía y Profesor Titular de la Universidá Autónoma de Madrid. Dende 1993 ye miembru de l'Academia de la Llingua Asturiana y tien escrito delles obres lliteraries y ensayos de distintes temátiques.