Cai l'ayuda de los gobiernos a les víctimes d’Haití

Cruz Colorada llamentó que la respuesta de los Gobiernos a les víctimes del terremotu d'Haití, del que se va cumplir un añu la selmana qu'entra, pasó de la fase "mui eufórica" inicial a una situación de "falta de respuesta internacional".

  
Coles mesmes, informó de que nunca se produxo tal movilización de recursos pa un solu país, na so gran mayoría procedentes de donantes privaos, y que "España foi'l tercer país en volume de participación", per detrás d'Estaos Uníos y Canadá.
  
Mientres una rueda prensa con motivu del primer aniversariu de la traxedia, el coordinador xeneral de Cruz Colorada n'España, Toni Bruel, esplicó esti martes que la d'Haití foi una movilización masiva de recursos "como nunca se viera pa un solu país, tanto de la Cruz Colorada Internacional, como per parte de la población civil".
  
En concreto, de los 42 millones d'euros de fondos recaudaos, el 76,2 por cientu provién de donaciones de la población xeneral, mientres que'l 12 por cientu vien de les empreses, el 10,29 por cientu del gobiernu o instituciones públiques y el 1,44 restante d'otres ONG.
  
Coles mesmes, apuntó que "España foi'l tercer país en volume de participación" dientro de los 110 países que formen la organización de la Cruz Colorada Internacional, "tres Estaos Uníos y Canadá", lo que permitió enviar "más de 1.861 tonelaes de suministros, en diez envíos d'ayuda d'emerxencia per avión y otros 26 per barcu". Cruz Roja Internacional cuenta con un total de 766.000 beneficiarios d'atención sanitaria.

Los gobiernos nun caltienen la mesma respuesta
Per otra parte, Bruel calificó de "insostenible" qu'un país puea tar sin desescombrase mientres casi un añu. D'esta forma, culpó a los mecanismos de los gobiernos por nun caltener la mesma respuesta que desarrollaron cuando se produxo'l terremotu. "Nós vemos qu'hai una fase mui eufórica de respuesta que les organizaciones caltienen pero que los mecanismos de los gobiernos nun lo faen. Y esto ye imprescindible", señaló.
  
Asina, alvirtió que "ésti ye una tema que nun correspuende a les organizaciones, sinón a acuerdos ente gobiernos", dao que "son respuestes que requieren maquinaria pesada y esto nun se produxo". "Ye una falta de respuesta internacional", añadió.
  
En tou casu, defendió'l papel de l'Axencia Española de Cooperación y Desarrollo (Aecid) ) y afirmó que "la respuesta española ye mui coherente y ta coordinada ente tolos actores qu'intervienen".

"La epidemia ta complicando'l procesu"
Pela so parte, la xefa de la Misión de CRE n'Haití, Pilar Palomino, aseguró que la epidemia de cólera "ta complicando'l procesu" y "obligó a ampliar la zona d'intervención". Asina, esplicó que se sigue produciendo un aumentu de casos "cada día" y reconoz que nun saben cómo va dir evolucionando.
  
Nesti sen, indicó qu'esti fechu "requirió un esfuerzu adicional de la organización, tamién nel ámbitu humanitariu, pa tratar a la población afectada". Por ello, Cruz Colorada estableció un plan d'actuación hasta mayu del 2011 per el que se procedió a la instalación de puestos de rehidratación oral, a la desinfección de los campos de movíos y comunidaes, asina como a emprestar apoyu a seis Centros de Tratamientu del Cólera y al envíu de 750.000 llitros de soluciones intravenoses.

El procesu electoral
A lo último, Palomino refirióse al procesu electoral nel que s'alcuentra'l país y que provocó que la situación seya "más delicada" a la hora de desarrollar los sos proyectos. "Les manifestaciones o disturbios afectaron a la nuesa movilidá, pero la Cruz Colorada goza de bona imaxe ente los haitianos y pudieron caltenese toles actividaes básiques con normalidá", repostió.
  
Sicasí, alvirtió de que los proyectos al llargu plazu, n'algún casu, sí tuvieron que retardase mientres alguna selmana, dao que'l país pasó dellos díes paráu dafechu. En tou casu, asegura que "les relaciones coles autoridaes del país son mui bones, hasta dende antes del terremotu".