Cascos algama los primeros apoyos pa liderar un nuevu partíu

L'ex vicepresidente del Gobiernu y ex secretariu xeneral del PP, Francisco Álvarez-Cascos, amosó la so disponibilidá a liderar un nuevu partíu. Cargos públicos del PP yá-y dieron apoyu.

Nuna rueda de prensa celebrada n'Uviéu pa esplicar los motivos del so arrenunciu a la militancia nel PP, Cascos resaltó que la so disponibilidá ye la mesma qu'enantes del 1 de xineru, magar "agora les circunstancies nun se paecen en nada" a les d'antes d'Añu Nuevu.
     
"Confírmo-yos que lo asocedío nos últimos díes nun afectó no más mínimo a la mio disponibilidá p’abordar la xera de recuperar l'arguyu de ser asturianos, nin duldé un minutu en caltenela ante toos cuantos siguen creyendo que puedo ser útil pa sumar en tan honrosu proyectu. Sorrayo’l compromisu de sumar, porque solo un equipu numberosu y bien entamáu puede algamar con éxitu una xera tan difícil", destacó.
  
Ello ye que remarcó que la so "disponibilidá" pa "trabayar por Asturies ye fuera del PP" y confirmó el so empadronamientu en L.luarca (Valdés). "Ye una decisión irrevocable", señaló en referencia a la so marcha del PP.  
  
Coles mesmes, criticó a la dirección estatal del PP la so actitú nesti procesu electoral de mou que, al so entender, "Asturies impórta-y un comín". Aseguró que los intereses xenerales" d'Asturies "importaron muncho menos" qu'otros “intereses particulares" de la dirección y, en concretu, del líder 'popular', Mariano Rajoy.
  
Pelayo Roces renucia de diputáu
El diputáu del PP na Xunta Xeneral del Principáu d'Asturies, Pelayo Roces, tien previstu formalizar esti llunes la so arrenunciu a la condición de diputáu del Grupu Parlamentariu Popular.
  
Roces Arbesú, que ye amás vicepresidente de la Xunta Xeneral, ye ún de los  diputaos asturianos del PP averaos a Cascos. Va formalizar la so nueva situación nel rexistru del Parlamentu asturianu a -yos 12.30 hores.
  
El diputáu asturianu va facer efectiva la so decisión un día dempués de que'l mesmu ex ministru de Fomentu, Francisco Álvarez-Cascos, esplicare n'Uviéu los sos motivos pa dexar el PP y calcara en que sigue disponible pa un nuevu proyectu políticu n'Asturies.

González, a disposición
El conceyal del PP en Xixón Pablo González aseguró esti llunes a Europa Press que va ser "coherente" cola so postura anterior y actual de sofitu al ex ministru asturianu Francisco Álvarez-Cascos. "Pongo a la so disposición pa emburriar nesi proyectu de cambéu y de rexeneración económica, social y política d'Asturies", aseguró.
  
Anque nun quixo adelantrar si va dar de baxa del partíu, al qu'entró en 1987 al traviés de Nueves Xeneraciones, indicó que va facer pública la so decisión y dexó entever qu'el so respaldu al proyectu del ex ministru asturianu. "Taba con Cascos y sigo con Cascos", dixo.
  
González apuntó que "tola ufierta política que güei hai n'Asturies "faise de llombu a los asturianos", indicó enantes de señalar que ye "un murnia realidá" el desencantu qu'existe colos políticos y colo que pasa n'Asturies.