L’independentismu corsu xúnese baxo una única sigla

El complexu movimientu nacionalista corsu, tradicionalmente dividíu, dio esta selmana un pasu pa presentase con una sola voz énte la socieda isleña. Baxo’l nome de Corsica Libera (Córcega llibre, en corsu), les cuatro formaciones principales del independentismu corsu, Corsica Nazione, Rinnovu, l'Accolta Naziunale Corsa y Strada Dritta, aconceyen col oxetivu final de crear un estáu corsu.

Ún de los representantes d’esta nueva formación, Pierrot Poggioli, declaró al periodicu Corse Matin que l'independetismu “dende 1989 malgastó muncha enerxía inútil”, añadiendo que “anguaño demostramos que somos una alternativa en Córcega, debemos tar presentes nos temes sociales, particularmente, pa tener en cuenta los problemes venceyaos al poder alquisitivu, de vivienda, l’accesu al empleu, a la tierra etc”.

No que cinca a les actuaciones violentes por parte de dellos sectores del independentismu corsu, la nueva formación señala que va sofitar a los "presos políticos" y al  "movimentu clandestinu, que sabrá recular cuando s’alcuentre una solución política pa Córcega". El principal grupu armáu corsu ye’l FLNC (Frente Lliberación Nacional de Córcega).

Dientru del movimientu corsu, “Corsica Libera” va competir con otres formaciones, nesti casu del autonomismu corsu , como’l Partíu de la Nación Corsa y “A Chjama”. Anguaño, na Asamblea  de la Colectividá Territorial de Córcega, nome oficial del parlamentu del modelu autonómicu francés pa la isla mediterranea, namás que‘l PNC xunta a “A Chjama”, con cinco escaños, y Corsica Nazione con tres tienen representación, d'un total de 51 escoyíos cada seis años.