El CUPA algama que l'asturianu tea nel concursu lliterariu universitariu

El Conceyu Universitariu pol Asturianu (CUPA) algamó que’l Primer Concursu Lliterariu Universidá d’Uviéu almitiera obres n’asturianu, tres la modificación de les sos bases que namás permitíen testos en castellanu.

Tres el conocimientu de les bases que namás permitía obres en castellanu, el CUPA púnxose el contacto col Vicerrector d’Estensión Universitaria, Cultura y Deportes, Vicente Domínguez, que, según el colectivu, “recibió mui positivamente la propuesta de camudar esti puntu pa que se pudieren presentar obres tamién en llingua asturiana”.

Tres l’amparu del Serviciu Xurídicu pa cambiar llegalmente les bases nuna convocatoria yá abierta, va publicase’l cambiu nel BOPA “a non tardar”, como comuniquen dende’l CUPA. Amás, el plazu va ampliase hasta’l 11 d’abril.

Dende’l CUPA afirmen que tán “percontentos” cola decisión y dan la so norabona al Vicerrector Vicente Domínguez “pol cambiu de criteriu”. Pal colectivu universitariu prollingua, l’acción del responsable universitariu foi “una amuesa de bona voluntá pa cola llingua asturiana”.

Pasaron 100 años
Per otru llau, el CUPA recuerda que yá en 1908, coincidiendo col 300 Aniversariu de la Universidá d’Uviéu, el rector Fermín Canella convocó un concursu lliterariu que cuntaba con una categoría pa obres en llingua asturiana.

“Tuvieron que pasar 100 años pa qu’otru concursu vuelva a tener categoría de llingua asturiana pero agora esperamos qu’esta categoría se caltenga nel tiempu”, acaba’l Conceyu Universitariu pol Asturianu na so nota de prensa.