UNA pide que se respete la llegalidá na obra de la incineradora

Unidá Nacionalista Asturiana (UNA) reclamó que COGERSA respete los trámites pa instalar la incineradora y con ello permita l’alderique que se negó pa decidir la so contrucción.

Tino Fernández como voceru de medioambiente d’UNA, reclamó que COGERSA respete los trámites ambientales pa la instalación de la incineradora en Serín, polo que tien d'esperar al perceptivu informe d'impactu ambiental pa decidir el so allugamientu definitivu. Amás, acusó a los sos responsables de resalvalos pa volver evitar l'alderique sobre la so construcción, como fixeron na so aprobación inicial.

Pal voceru nacionalista “la única política medioambiental que ta llevando a cabu'l gobiernu asturianu ye la de fechos peracabaos, poniendo en marcha proyectos qu'una vegada empecipiaos el costu ambiental de paralizalos y volver empecipialos sía mayor que la so conclusión”.

Según Fernández, esto supón que “los xueces nun puedan actuar na mayoría de los casos porque'l bien públicu que tienen que protexer, nesti casu'l medioambiente, yá ta afectáu de forma irreversible pola actuación gubernamental”.

Torgar la tutela xudicial
Dende UNA considérase qu'esta forma d'actuar “torga la tutela xudicial efectiva de los valores medioambientales, que ye lo que tán pretendiendo faer con COGERSA, énte los más que probables varapalos de xueces y UE, avanzar la obra de forma inesorable, por que darréu sía invidable la so paralización”.

Pal voceru d’UNA, esto “enllena d'arguyu a los personaxes que pueblen el PSOE ya IX, que creen que les lleis nun van con ellos, pero enllénanos de vergüenza a toes y toos lo que creemos nos procedimientos y polo tanto na democracia, inexistente ensin una verdadera tutela xudicial sobre les decisiones de los gobernantes”.

Tino Fernández tamién destacó que “l'estudiu de distintes alternatives sacaría a la lluz los efectos sobre'l territoriu onde s'instale, colo qu'abriría l'alderique que se negó pa la so instalación” yá que les característiques del trámite pa llograr un analís d'impactu ambiental “va poner en claro toles consecuencies que lleva la opción de la incineradora, lo que quieren evitar de toes toes, porque cuando se xudicialice la so instalación, los efectos nocivos de la mesma esleiránse coles sentencies y recursos varios”.