Buendía, el que peor trató’l mediu ambiente según los ecoloxistes

La Coordinadora Ecoloxista d’Asturies entregó la Buyada Purpurina, reconocimientu a les actuaciones contraries a la naturaleza y mediu ambiente. El conseyeru de Mediu Ambiente, Francisco González Buendía, ye’l ‘premiáu’.

El puertu de Xixón, Coxersa, la Incineradora, el Puertu d’Avilés… yeren dalgunes de les candidates a esti galardón. Sicasí, foi’l conseyeru de Mediu Ambiente, Ordenación del Territorio y Infraestructures, Francisco González Buendía, la persona con “abundantes méritos” negativos pa cola naturaleza asturiana.

“Situar a la so Conseyería na cola de la llexislación ambiental dientro del estáu de les autonomías”, foi pa los ecoloxistes el principal motivu pa que Buendía llevara la Buyada Purpurina.

A too esto, súmense una montonera de causes como l’amparu a la llínia d’Alta tensión Lada-Velilla; non someter a evaluaciones medioambientales planes como’l de la Zalia; la “obsesión n’hormigonar Asturies vendiendo’l paisaxe por unes miserables compensaciones”, la incineradora, incumplimientos de la normativa medioambiental o ser el territoriu más contamináu del Estáu español, ente munches otres.

Deucracia
“Ye’l principal responsable políticu de que n’Asturies se niegue el derechu a la participación de les asociaciones y grupos ambientales nos órganos de decisión”, criticó la Coordinadora Ecoloxista.

Amás, los ecoloxistes denunciaron que na composición d’órganos como la Comisión d’Asuntos Medioambientales “perdura la más absoluta falta d’independencia, d’oxetividá y de defensa del interés xeneral al ser los sos miembros nomaos pola llibre designación”. “Altos funcionarios, Xefes de Serviciu, tamién tán nomaos a deu”, sorrayó la Coordinadora Ecoloxista d’Asturies nel so comunicáu.