Los ecoloxistes denuncien irregularidaes en Navia

La Coordinadora Ecoloxista denunció ante la Dirección Rexonal de Mines y ante la Viceconseyeria de Mediu les “irregularidaes ambientales" que detectaron na esplotación d’una industria estractiva que s'atopa en Navia.

La industria ta allugada na proximidá de la localidá de Piñera nel conceyu de Navia y dende 1.997 tien el nome de cantera de Rencaños.
  
Según recordaron los ecoloxistes al traviés d'un comunicáu, a la esplotación concedióse-y una ampliación en 2007. A pesar del tiempu trescurríu nuna visita dende l'esterior de la zona'l colectivu asegura que comprobó que resulta evidente que s'incumplen parte de les condiciones ambientales impuestes na so última ampliación.
  
Asina, aseguren que l'areneru qu'esplota la empresa Construcciones, Jesús Martínez, S.A. dedícase a la obtención d’arenes y presenta importantes déficit ambientales nes sos instalaciones. Por exemplu apréciense "bien de folles y altos niveles de sedimentación nes balses de decantación, que presenten un eleváu nivel de precariedá"; nun s'instaló barrera dalguna cortavientos, nin malla cinexética dalguna alredor de la esplotación y anexos, ente otros defectos.
  
Respuesta del Principáu
Por tou ello los ecoloxistes esperen que'l Principáu esixa ensin demoranza estes midíes p'amenorgar el fuerte impactu ambiental de la cantera, ya investigue les razones pola qu'esiste esta permisividad con esta esplotación con estos incumplimientos ambientales nestos últimos años.