Conciertu d'Alfredo González en Xixón

El rock d’autor d’Alfredo González llega esti xueves 23 al so fin de xira. El turonés va actuar na Sala Acapulco de Xixón nun conciertu especial pa despedir más de dos años de xira.
Alfredo González ye ún de los nuevos esponentes del rock d’autor fechu n’Asturies. Nacíu en Turón nos años 80, presentó en 2004 “La vida de alquiler”, el so primer trabayu. Cinco años dempués llegaron casi de secute dos nueves referencies: “Dudas y precipicios” (DFX Records) y “La nada y tú” (Ámbitu/L’Aguañaz).
 
El cantar homónimu d’esti últimu trabayu – que tien tolos sos cantares en llingua asturiana- valió-y pa representar a Asturies nel festival Liet de música en llingües minoritaries. Amás, llevó dos premios AMAS y el Premiu de la Crítica de la RPA.
 
Tres más d’un centenar de conciertos, Alfredo González despide más de dos años de xira esti xueves 23 en Xixón. A les 22 hores, la Sala Acapulco va dar abellugu a un conciertu especial nel que’l turonés tará acompañáu de la so banda y d’invitaos especiales como los cantautores Pablo Moro o Edu Vázquez, ente otros.
 
Futuru doble álbum

Per otru llau, Alfredo González alcuéntrase yá mesmu grabando un doble discu que va asoleyar nos primeres meses de 2011. El trabayu, grabáu nos Tutu Estudios de Corvera, va tener diez temes n’asturianu y diez en castellanu.