El PP entiende qu'hai "dexación de funciones" nel casu los horros de San Andrés y Valledor pide "sanciones exemplares"

|

La diputada rexonal y el conceyal del Partíu Popular en Xixón, Ana Barrientos y Manuel Pecharromán, acusaron güei a les Alministraciones Públiques de "dexación de funciones" ante'l casu de la desapaición d'horros y paneres en San Andrés de los Tacones, en terrenos de la Zona d'Actividaes Lloxístiques y Industriales d'Asturies (Zalia). Pela so parte, el diputáu d'IU-BA-Verdes, Francisco Javier García Valledor, solicitó güei a los responsables de Cultura y Turismu del Principáu d'Asturies, que "depuren responsabilidaes" y que s'apliquen "sanciones exemplares".
 
Barrientos anunció, en rueda prensa, na sede xixonesa del PP, que'l próximu viernes va declarar el director de la Zalia, Enrique Álvarez, ante la Comisión d'Urbanismu y Infraestructures pa presentar l'estudiu de viabilidá y d'Impautu Ambiental d'esta zona lloxística y añadió que'l PP va aprovechar pa entruga-y por esta cuestión, denunciada yá en branu polos vecinos de San Andrés de los Tacones.
 
De la mesma maenera, indicó qu'esti viernes, va aldericase na Xunta una proposición non de llei, a propuesta del PP, na que s'encamienta al Conseyu de Gobiernu a que faiga un inventariu y un catálogu de tolos horros y paneres d'Asturies, que Barrientos cifró ente 10.000 y 15.000, amás d'adoptar midíes de proteición. La diputada espresó'l so deséu de qu'IU apoye esta proposición.
 
Amás, va entrugar a la conseyera de Cultura, Mercedes Álvarez, por qué nun s'actuó enantes. por qué s'esperó seis meses pa dar una contetación a los vecinos y abrir una investigación. "Nesti casu se metió la pata hasta'l fondu", aseguró, enantes d'encamentar a que'l casu nun vuelva a repetise nel futuru.
 
Barrientos tamién criticó que s'use un doble criteriu a la hora d'aplicar la Llei de Patrimoniu, ún pa los propietarios particulares, y otru pa la propia Alministración, con alusión a la entidá semipública de la Zalia. Según ella, polo menos trátase d'una actuación "irregular y neglixente".
 
Na so opinión tán incumpliéndose les lleis y el que tien que velar por elles ye "el primeru que les incumple", dixo. Amás, indicó que nesti casu hai responsables "por aición y por omisión", al destacar que lo único que fizo la Conseyería foi pidir información al Ayuntamientu y qu'esti actuó "mal y tarde".
 
Pela so parte, Pecharromán aludió al catálogu de Patrimoniu Etnográficu ellaboráu pol Ayuntamientu, nel que se contempla qué elementos necesiten proteición integral, que son los de mayor interés patrimonial, con especial atención a horros, paneres y cabazos de 1940.
 
"DESPREOCUPACIÓN Y ABANDONU"
 
Pela so parte, y entrugues d'Europa Press, Valledor llamentó la situación de "despreocupación" y "abandonu" de tolo rellacionao nel Principáu cola cultura tradicional asturiana, nesti casu l'arquitectura popular. Pero al so xuiciu, el casu de San Andrés de los Tacones ye "más grave". "La propia Alministración s'asitia al marxe de la llegalidá y de los sos compañeros de Cultura", señaló.
 
En rellación a les declaraciones d'ayeri del xerente de la Zalia, sobre'l futuru de los horros en manes privaes, Valledor señaló: "yo nun sé como será como xerente de la Zalia, pero son les declaraciones d'un perfeutu imbécil", afirmó.
 
Asina, Valledor esplicó que los horros han tener un tratamientu estipuláu pola Conseyería de Cultura y qu'existen instituciones públiques como'l Muséu del Pueblu d'Asturies, que van ser los que señalen el destín final de los horros, "nel supuestu de que nun sufrieren desperfeutos que nun se puean iguar".

Contador Estadistiques