El Congresu refuga que les sociedaes puean inscribise nel Rexistru Mercantil en llingües cooficiales

|

El Congresu de los Diputaos refugó güei, colos votos de PP y PSOE, sendes proposiciones non de lei de CiU y ERC poles que s'encamentaba al Gobiernu a modificar la normativa pa que les sociedaes pudieren inscribise nel Rexistru Mercantil en cualquiera de les llingües cooficiales y non sólo en castellán. Dambes iniciatives contaron sólo con dos votos a favor, los de los proponentes, frente a 35 a la escontra.

La diputada de CiU Montserrat Surroca argumentó demientres la so esposición que se trataba d'encamentar al Gobiernu realizar una reforma de la llei que se llenda a un "reaxuste normativu", ensin que con ello se xenerare una "resquiebra" nel sistema. Poro, apellando a la "coherencia", solicitaba que les nueves inscripciones nel Rexistru Mercantil pudieren facese tamién nes llingües del Estáu distintes al castellán
 
Pal diputáu d'ERC, Joan Tardá, dicha revisión normativa tien una "gran trescendencia dende'l puntu de vista de la normalización llingüística", anque puea paecer una "caxigalina". Al so entender, esti asuntu debía asumilu con "naturalidá" y "dase por fechu" teniendo en cuenta la "evolución" de la sociedá y la "maduración" del Estáu, tres 30 años de democracia.
 
La diputada del PP Dolores Monsterrat respondió a ERC que la maduración del Estáu democráticu, mui al contrario, tien que ver cola pluralidá llingüística y non cola pretensión de llevar a una comunodá autónoma hacia'l monollingüismu. Al so xuiciu, también "de manera natural", la forma xurídica de les sociedaes nel Rexistru Mercantil tien de recoyese en castellán por ser una cuestión qu'afeuta a tol territoriu nacional y a la internacionalización de les empreses.
 
Nesta llinia s'espresó, el diputáu socialista Alex Sáenz Jubero, qu'aseguró que la esposición de los partíos, "nun se correspuende cola realidá", refugando asina qu'ésta seya una "problémtica real" en Cataluña. Asina, esplicó que la inscripción de les sociedaes nel Rexistru Mercantil respuende a un criteriu de "unidá", anque sí mostró la so disposición a estudiar "dalgunos cambios" y propunxo a los proponentes una enmienda pa crear una comisión específica que, sin embargu, se refugó.

Contador Estadistiques