El TSXA archiva la querella de 'El Ferreiro' contra Álvarez

El Tribunal Superior de Xusticia d'Asturies (TSXA) archivó querella criminal por inxuries interpuesta por José Naveiras, antiguu director del Muséu Etnográficu de Grandas de Salime, contra la conseyera de Cultura, Mercedes Álvarez.

Contra la resolución cabe interponer recursu de reforma nel plazu de trés díes.
  
Nel autu del Altu Tribunal asturianu, el maxistráu instructor, José Manuel Buján, considera que la querella "tresciende o tresvasa l'ámbitu de lo xurídico quedando más bien nel ámbitu políticu". Amás, estima que'l relatu de la conseyera na comparecencia que tuvo llugar el 22 de febreru en sede parlamentaria "de nenguna manera pue tachase d'inxuriosu nin calumniosu", tal como se señala nel escritu.
  
En reconociendo que pue haber "discrepancies" na apreciación de determinaos fechos, l'instructor señala qu'imparcial y oxetivamente nun pue compartir que tanto'l conteníu de dichu informe como les espresiones utilizaes nel mesmu y nes respuestes a les entrugues que se-y formularon puean ser constitutives de "nengún de los delitos que se-y imputen a la conseyera".
  
Coles mesmes, l'instructor defende que "el radicalismu" de delles de les espresiones utilizaes foi frutu de "la confusión" que tuvo llugar nel debate parlamentariu ente lo público y lo privao, y que lo desvirtuó. "Nun paez que se trate del debate que se quería, sinón d'un subterfuxu amparáu nel malestar social creáu por un desafortunáu despidu, declaráu xudicialmente improcedente, p'apoyar unos al director despidíu y criticar a quien consideraben l'autora material del despidu", señala.
  
Por too ello, el maxistráu entiende que "nun existe delitu, puesto que nun hai dolu necesariu pa la so existencia, nin la materia oxetu de debate tresciende lo puramente amparao, nel so casu, como causa de xustificación por escelencia nesti tipu de delitos pola llibertá d'espresión y el derechu d'información constitucionalmente consagraos".
  
Les acusaciones d’Álvarez
Ente otres manifestaciones, Mercedes Álvarez acusó al daquella director de llograr productos que dempués comercializaba a títulu particular, d'utilizar de manera privada instalaciones y bienes, lo mesmo que de realizar obres sin autorizar que permitieron la construcción de "una vivienda moderna" na parte alta del muséu, pa usu priváu del director.
  
L'archivu d'esta querella súmase al que yá decidió'l TSXA'l pasáu día 3 contra la conseyera por un supuestu delitu d'espropiación illegal y contra la propiedá intelectual.