Los eurofuncionarios sí se suben el sueldu

Los países de la Unión Europea aprobaron subir un 0,1% el sueldu de los eurofuncionarios nel 2011, pese a la crisis y a los recortes que dellos Estaos miembros, ente ellos España, aplicaron a los salarios de los sos propios funcionarios.

Los países de la Unión Europea aprobaron subir un 0,1% el sueldu de los eurofuncionarios nel 2011, pese a la crisis y a los recortes que dellos Estaos miembros, ente ellos España, aplicaron a los salarios de los sos propios funcionarios.

Amás, los funcionarios comunitarios van recibir íntegramente la subida del 3,7% correspondiente al exerciciu 2009-2010, como propunxera la Comisión.
  
Los Ventisiete acordaron el pasáu avientu recortar esta subida a la metá, el 1,85%, pa tener en cuenta l'impactu de la crisis, pero'l Tribunal de Xusticia de la UE declaró illegal esta decisión. Por ello, los Gobiernos decidieron acatar la sentencia y pagar el 1,85% adicional.
  
D'esta manera, los sueldos de los eurofuncionarios van tar ente los 2.654 euros al mes que cobra un recién contratáu de categoría 1 (la más baxa) y los 18.370 euros al mes que recibe un funcionariu de la máxima categoría (16) con cuatro años d'antigüedá.
  
El so axuste añal calcúlase teniendo en cuenta la evolución nel últimu añu de la retribución de los funcionarios n'ocho Estaos miembros (amás d'España, Alemaña, Francia, Reinu Uníu, Italia, Países Baxos, Bélxica y Luxemburgu), que representen el 76% del PIB de la UE; y un índiz sobre'l costu de la vida pa funcionarios internacionales en Bruxeles. Sicasí, los cambios aplíquense con un desfase temporal de dellos meses.
  
La Comisión asegura que les normes vixentes son automátiques y nun dexen marxe de maniobra pa proponer un recorte distintu. El Tribunal de Luxemburgu apoyó en bona midida esti argumentu.