PSOE, PP y IU refuguen el debate de los Rayos X en Llanes

El Bloque por Asturies denunció un “nuevu exerciciu d’antidemocracia” de PSOE, PP y IU-Verdes, que votaron a la escontra de que la Xunta Xeneral debata la Proposición Non de Llei sobre’l serviciu de Rayos X en Llanes.

El BA presentara una Proposición Non de Llei col oxetivu de debatir y poner en marcha los Rayos X de Llanes, serviciu sanitariu que lleva 17 años paralizáu. Según los nacionalistes, esti serviciu ye “perimportante pa la población del llugar y pa desconxestionar la xestión sanitaria del Hospital de Les Arriondes”.

Sicasí, na Xunta de Portavoces del Parlamentu Asturianu, PSOE, PP y IU-Verdes rechazaron otra vuelta más una propuesta del Bloque por Asturies. Nesti casi, el BA critica enforma l’actitú del PP que, según comenten, “comprometíerase públicamente nos medios de comunicación y ante los vecinos cola puesta en marcha de la unidá de Rayos X” y que, “inesplicablemente”, votó a la escontra del alderique nel parlamentu.
"Actitú hipócrita"
“Esto amuesa una vez más non sólo’l so furrular antidemocráticu, sinón qu’amás engañen y mienten énte los medios de comunicación y ensin nengún tipu de vergoña a miles de ciudadanos y ciudadanes”, sentenció’l BA sobre la "actitú hipócrita" del Partíu Popular.