L.lena presentó la campaña "n'asturianu queda guapo"

El conceyu de L.lena presentó güei la campaña “N’asturianu queda guapo”. Esta iniciativa que ta dirixida a los neños del conceyu consiste na edición de 6 modelos de carteles nos que se trabaya un vocabulariu mui usáu como ye: el patiu, la calle, la clase, el comeor, el bañu y el cuerpu humanu. Los carteles van repartise peles escueles del Conceyu, nes ludoteques y nel serviciu de pediatría.  
Con esta campaña, el Serviciu de Normalización Llingüística “pretende siguir reforzando la llingua de los más pequeños. Los carteles, nos que se recueye vocabulariu bien cercanu a los nenos, tienen en común l’usu de la variante llingüística de L.lena. Así, los críos del conceyu  salen al preu, garren un pletu pa comer, toquen el xibletu o duel-yos el costezu.”. La iniciativa pretende ser tamién una “ferramienta de trabayu pa los enseñantes del conceyu, yá qu’actualmente hai bien poco material didácticu que recueya la variante llingüística del conceyu”.
La campaña fíxose cola ayuda de la Conseyería de Cultura con una subvención de 500€ y en collaboración cola Rede de Normalización Llingüística nos Conceyos.