El PP estatal nun contempla un congresu n'Asturies

La dirección estatal del PP nun contempla la celebración d'un congresu estraordinariu n'Asturies pa escoyer al candidatu a les próximes elecciones autonómiques, como demandó l'ex ministru de Fomentu Francisco Álvarez Cascos.

Asina lo reiteró esti llunes en rueda prensa'l vicesecretariu de Comunicación del PP, Esteban González Pons, cuando se-y preguntó si 'Génova' descarta esi congresu n'Asturies. "Sobre la mesa nun ta un congresu estraordinariu", declaró.
  
Esti branu, l'ex ministru remitió a la dirección nacional un documentu colos pasos que, al so xuiciu, deberíen dase n'Asturies pa ganar les elecciones. "La solución adecuada pa preparar con éxitu les respuestes a tolos retos plantegaos ye la celebración d'un congresu rexonal del PP d'Asturies, antes de les próximes elecciones", rezaba nel citáu documentu.
  
Ye más, Álvarez-Cascos señalaba qu'esi cónclave debería convocase baxo fórmula estatutaria de "votu directu de tol censu de militantes del PP d'Asturies, col mesmu modelu que recientemente permitió organizar el congresu del PP de Baleares".
  
D'acuerdu colos estatutos del PP, los congresos ordinarios celébrense cada trés años y n'Asturies tocaría facelo la próxima seronda. La dirección estatal del partíu nun ye partidaria d'adelantalu pa celebralu antes de les elecciones, indicaron fontes 'populares' a Europa Press.

Comisiones de Derechos y Garantíes
Ante les manifestaciones d'Álvarez Cascos quexándose porque Génova nun actuare ante los insultos ('sexaxenariu' o facer política de 'kale borroka') que recibió per parte de miembros del PP asturianu, González Pons indicó que les decisiones relatives a les sanciones correspuenden al Comité de Derechos y Garantíes, non al comité de dirección, que foi l'órganu que se reunió esta mañana.
  
A lo último, Pons nun quiso comentar les declaraciones del presidente de la Xunta, Alberto Núñez Feijóo, nes qu'asegura que la candidatura de Cascos paéz-y "buena", porque ye "caballu ganador". "Nun voi pronunciame", llendóse a dicir.