González afirma que volaría miembros d’ETA

L'ex presidente del Gobiernu Felipe González confesó que "probablemente" tomara la decisión de "volar" el coche nel que viaxaben los terroristes qu'atentaron nel supermercáu Hipercor de Barcelona nel añu 1987.

Esto fadríalo si llega a tener la oportunidá, y asina salvar la vida de les 21 persones qu'ellí morrieron.
  
"Esta ye namás una hipótesis, nunca se dio esta posibilidá, pero vamos ver: ¿si pudiera evitar qu'esos tipos que diben con un coche bomba a volar Hipercor lo ficieren, hasta volando'l coche colos tipos dientro, fairíalo? Pues probablemente sí. ¿Y eso ye realmente escandaloso? Pue que lo seya, pero dicir dende'l puntu de vista de la responsabilidá d'un gobernante, que tien la obligación prioritaria de defender la vida de los sos conciudadanos", confiesa González nuna entrevista na revista 'Vanity Fair', recoyida por Europa Press.
  
Nella, dexa claro que nunca decidió "directa nin indirectamente" mandar matar o executar a una persona, en relación coles actuaciones de los GAL, y asegura tener la "conciencia tranquila" nesti sen.

Según desvela, conoz a dirixentes de toles ideoloxíes que cuando nun puen detener a unos terroristes "non sólo tienen la tentación, sinón l'acción, de destruyilos pa defender les vides de los sos conciudadanos". "Esto pasa tolos díes na llucha contra'l terrorismu internacional, nos ataques a grupos talibanes y Al Qaeda n'Afganistán", defende.