Fala Non Caduca presenta en directu 'Tiempu de povisa'

Fala Non Caduca presenta esti vienres el so primer discu, 'Tiempu de Povisa', editáu col sellu Algamar. L'actuación va ser a les 20.30h nel Teatru Vital Aza de La Pola L.lena con entrada llibre.

El conciertu únicu va marcar l'entamu de la xira de presentación d'esti primer trabayu. Dempués del recital, celebraráse una espicha.
  
Esti álbum, según informó la propia discográfica, "ye la culminación a tres años de constante trabayu, un EP autoeditáu, numberosos conciertos a lo llargo de la xeografía estatal, collaboraciones con otros artistes, cambios na formación y un soníu muncho más que curiáu y definíu".
 
L'álbum "confirma a Fala Non Caduca como una de les bandes con más futuru dientro de la música n'asturianu". El títulu estrayéronlu de versos de la escritora asturiana María Teresa González, y reflexa la propuesta musical del llamáu 'MecigayuSon', etiqueta so la que Fala Non Caduca define'l so soníu caracterizáu pola fusión de distintos ritmos como'l ska, el rock, surf, reggae, folk o inclusive los ritmos llatinos.
 
'Tiempu de povisa' "fala de los tiempos actuales, tiempos de crisis, non solo económica, sinón crisis de valores, d'idees, d'ideales", según la casa musical. Según Algamar "fala de les realidaes social y cultural de l'Asturies de güei, de les problemátiques xuveniles, de los conflictos llingüísticos, del desarrollu industrial, del desamparu de la naturaleza virxe".
  
El trabayu discográficu, editáu por Algamar Producciones, grabóse n'Avilés nos estudios ACME, cola producción musical de Miguel Herrero, y nél collaboraron músicos de la talla d'Iñaki (vocalista de Betagarri), Mapi Quintana, Nel Sánchez, GPS Proyect, Fabián Díaz y Miguel Herrero.