Migoya ve “más seguridá” na reforma de la Función Pública

La conseyera d'Alministraciones Públiques y Vocera del Executivu asturianu, Ana Rosa Migoya, manifestó esti miércoles na Xunta Xeneral que la reforma de la Función Pública da más seguridá. Migoya compareció tres de les crítiques sindicales.

Migoya señáló qu’a lo llargo d'esta llexislatura nun se dio l'acuerdu necesariu nin les condiciones pa sacar alantre una llei de Función Pública, como-yos prestaba y poro'l Gobiernu optó por plantegar los cambios requeríos y urxentes, dándo-y primero cobertoria xurídica a la Llei de Carrera Profesional y agora dando más garantíes xurídiques a la provisión de puestos de trabayu al traviés del cambiu de la llei.
  
"L'Executivu optó por una norma más concreta que dea mayor seguridá xurídica a les provisión de puestos de trabayu con una llei muncho más concreta, asemeyada a la d'otres comunidaes como la Comunidá valenciana", dixo Migoya, que llamentó qu'hubiera organizaciones sindicales qu'optaron pela vía de la xudicialización nes relaciones llaborales del ámbitu de l'alministración pública.
  
La conseyera indicó que la nueva norma clarifica y establez los criterios qu'han rexir los procesos de selección y dase seguridá xurídica a los mesmos, colo que xustificó la necesidá de la mesma. Defendió amás el trabayu del Executivu en materia d'empléu públicu y destacó "la estabilidá" que se dio al colectivu de funcionarios.

Llibre designación
Destacó amás que'l sistema de provisión de llibre designación ye algo "escepcional" y úsase pa puestos que revisten especial "responsabilidá y confianza", y llamentó que delles organizaciones sindicales optaren pola vía de xudicialización.
  
Ana Rosa Migoya defendió qu'anguaño de los 22.221 funcionarios -escluyendo los estatutarios-- del Principáu hai 635 nomaos por llibre designación, lo que supon un 2,9% y añedió que tres l'aprobación cambéu de la Llei va haber 485, lo que supon un 2 per cientu frente al 5,8 per cientu esistente cuando'l PP gobernaba.
  
Por ello la conseyera acusó al PP y al so diputáu, Ramón García Cañal de demagogu. "Tien bemoles que daquién que tuvo nel Gobiernu de Sergio Marqués venga a esta Cámara a llanzanos exabruptos y a acusanos de saltanos la llei", dixo Migoya.
  
Sindicatos, BA y PP; críticos
Migoya compareció pa esplicar el proyectu de cambiu de la Llei de Función Pública. Antes d'ella comparecieron los representantes d'una docena d'organizaciones sindicales que mostraron el so "absolutu" refugu al proyectu y acusaron al Gobiernu de buscar "saltar la llei y refugar les sentencies al respecto".
  
Les mesmes crítiques compartiéronles los grupos parlamentarios del PP y de Bloque por Asturies. Asina, el representante del BA, Roberto Colunga, criticó que tres ocho años d'espera de la nueva llei preséntase un cambiu que busca saltase les sentencies xudiciales. D’esti mou, recordó que más del 10% de los funcionarios tienen llibre designación y acusó al PSOE de facer de la esceición una norma y presentar un cambiu "a la so imaxe y semeyanza bien lloñe de los criterios d'igualdá, capacidá y méritu".
 
El diputáu del PP, Ramón García Cañal, recordó a la conseyera la existencia de numberoses sentencies que dan la razón a eses organizaciones sindicales "de les que fala la conseyera" y anunció la presentación d'una enmienda a la totalidá del proyectu de Llei per parte del so grupu.
  
El diputáu del PP dixo amás que con esti proyectu de Llei'l Gobiernu quier llegalizar lo que por sentencia se declaró contrario a la llei y recordó que l'Executivu tenía como compromisu presentar nel Parlamentu la nueva Llei de Función Pública. Añadió que la finalidá primordial de cualquier reforma nesta materia tien que ser meyorar la calidá de los servicios que los ciudadanos reciben de l'Alministración y nesti sen "el Gobiernu nun traxo nengún cambiu a la Xunta".
 
 "Primero traen un cambiu pa correxir les allegalidaes y illegalidaes cometíes cola carrera profesional y agora traen otra que regula la llibre designación, algo bastante alloñáu de la meyora de los servicios", dixo Cañal, qu'indicó que los sindicatos manifestaron "un refugu casi unánime al cambiu".

Por ello Cañal acusó al Gobiernu de "facer tolo posible pa escapar de la xusticia" y d'ehí la tramitación d'esti proyectu de Llei per trámite d'urxencia.
  
PSOE y IX
La diputada del PSOE, Servanda García, recordó a Cañal que cuando él yera conseyeru "tamién s'usaben los mesmos métodos de nomamientu", y añedió que l'Alministración siempre busca la máxima capacidá y máxima valía nesos nomamientos.
  
Pela so parte la diputada d'IX-Verdes, Diana Camafeita, compartió cola conseyera la falta de condiciones pa poder sacar alantre una nueva llei de Función Pública sobre la base del consensu. "A nós prestábamos que fuere posible y considero qu'esti cambiu yera necesariu", dixo Camafeita, qu'afirmó que va recoyer algunes de les cuestiones plantegaes polos sindicatos pa poder meyorar el testu.