El Bloque propón que La Lladrona seya Monumentu Natural

El Bloque por Asturies al traviés del so Diputáu na Xunta Xeneral, Roberto Colunga, presentó una Proposición Non de Llei pa que se nome Monumentu Natural a la islla La Lladrona.

La islla La Lladrona que ta asitiada na mariña de Santa María del Mar, Castrillón, ye un llugar natural destacáu. “A los munchos valores naturales, paisaxísticos, hestóricos, arqueolóxicos, medioambientales, xeolóxicos,... que tien la isla, hai qu'añedir los aspeutos cultural y artísticu d'esti espaciu natural”, señalen dende’l BA.
 
Arriendes d'ello, el diputáu del Bloque por Asturies, Roberto Colunga, plantega una Proposición Non de Llei coles mires de que la Xunta Xeneral encamiente al Conseyu de Gobiernu del Principáu de Asturies a nomar Monumentu Natural a la islla La Lladrona y a tomar les midíes necesaries pa protexer la superficie del enclave según lo fondos marinos, que precisaríen d'una figura de protección que podría ser la de Reserva Natural.