Termast estudia una propuesta de terminoloxía en Física

L’Academia de la Llingua Asturiana ta acabantes de recibir una propuesta terminolóxica pa Conceptos Básicos de la Física. La propuesta ta enmarcada dientro del proyectu Terminoloxía Asturiana (Termast).

Son 400 los términos básicos nel ámbitu científicu de la Física que l’autor de la propuesta, Rubén Martínez Fernández, tresmitió a l’Academia de la Llingua Asturiana (ALLA) col oxetivu d’anovar el léxicu terminolóxicu asturianu. Esti autor yá asoleyara en Termast otru vocabulariu rellacionáu coles matemátiques.

Estudiosos, especialistes y posibles usuarios van ser los encargaos d’analizar la propuesta de Martínez. Según señala l’ALLA “el tiempu dirá, nesti sen, qué propuestes acaben formando parte del corpus normativu de la llingua asturiana”.