El Gobiernu va pidir la prórroga del estáu d'alarma

El voceru del Grupu Socialista nel Congresu, José Antonio Alonso, anunció que'l Gobiernu va pidir la prórroga del estáu d'alarma declaráu'l día 3 tres el zarru del espaciu aéreu pol plante de los controladores.

La solicitú, por un tiempu que va decidir el Conseyu de Ministros y que podría cubrir toles Navidaes, va votase'l xueves nel Congresu.
  
En rueda prensa nel Congresu, y mientres el ministru de Fomentu, José Blanco, comparecía na Cámara sin dar por fechu si va pidise o non la prórroga, Alonso proclamó que "el Gobiernu nun pue tolerar nengún riesgu d'otru paru selvaxe" de los controladores aéreos y "tien qu'asegurar el derechu de tolos ciudadanos a viaxar máxime nestes feches del periodu navidiegu".
  
"Por consiguiente'l Gobiernu va pidir la prórroga del estáu d'alarma y esperamos y tamos seguros de que la mayoría de la Cámara va tar d'acuerdu con esta prórroga --reveló--. Esta tarde va haber un Conseyu de Ministros que va tomar esta decisión de pidir la prórroga, que va debatise y votase'l xueves".
  
Tola navidá
Según esplicó, va ser el Gobiernu'l que decida por cuántu tiempu se pide la prórroga, pues aseguró que les posibilidaes nun se llenden a otros quince díes, sinón que podríen dir más allá pa cubrir toles feches navidiegues. 
  
Ante'l debate del xueves, y dao que'l Gobiernu cuenta col apoyu de los nacionalistes vascos, catalanes y canarios, Alonso encamentó al PP a definise, pues "nun-y va quedar otru remediu que decidir con quién ta, si col Gobiernu y los derechos de millones de ciudadanos o en contra de too ello".