BA critica a PSOE, PP y IX de “torgar” el debate contra’l maltratu animal

Bloque por Asturies criticó esti llunes que'l PSOE, PP y IX-Verdes "torguen que se debata" nel plenu de la Xunta Xeneral el proyectu de llei contra'l maltratu animal nos espectáculos públicos y actividaes recreatives.

Según declaró la organización política, "estos trés grupos parlamentarios muestren la so actitú antidemocrática, totalitaria y ayena a los intereses de los ciudadanos".
   
Asina, criticó que los voceros de los grupos parlamentarios del PSOE, PP y IU-BA-Verdes votaren en contra de que se lleve a plenu na Xunta de Voceres d'esti llunes, "a pesar de ser un tema bien reclamáu públicamente pola sociedá asturiana y ser ún de les temes del programa d'IU Verdes, qu'agora se nieguen a tratar", apunta’l BA.
   
Asina, una vez más, Bloque por Asturies reprochó a los trés partíos políticos "el pactu" que tienen, coles mires de "torgar antidemocráticamente y ensin nenguna xustificación política nin alministrativa", que les iniciatives presentaes pol Bloque por Asturies dende la so constitución como grupu parlamentariu, se debatan abiertamente nun plenu.
   
Procuradora xeneral
Por ello, dende'l Bloque por Asturies, esixen a la Procuradora Xeneral, María Antonia Fernández Felgueroso, qu'actúe d'oficiu "darréu", pa evitar que se vulneren descarada y abiertamente los derechos yá non yá d'un grupu parlamentariu, sinón "los derechos de los ciudadanos a los que se representa", y que piden, según caltién BA, "qu'estos temes se debatan públicamente nel Parlamentu asturianu".