Disturbios en Londres contra l'encarecimientu de la Universidá

Decenes de miles d'estudiantes manifestáronse en Londres en contra de los planes del Gobiernu británicu pa dexar que les universidaes encarezan a más de 10.700 euros la matrícula añal a partir del 2012.

Nes imaxes de televisión vese cómo los estudiantes superen les barreres que-yos torgaben llegar a la plaza del Parlamentu. Ellí produxéronse enfrentamientos cuando los policíes antidisturbios intentaron interponese nel camín de los mozos, que s'abrieron pasu y prendieron bengales.
  
Los manifestantes llanzaron contra los axentes les sos pancartes y los oxetos colos que formaren barricaes.
  
Mientres, nel Parlamentu, los llexisladores prepárense pa debatir los discutinios propuestos pa triplicar el preciu de les matrícules universitaries. Había rumores de que la metá de los parlamentarios lliberaldemócrates -que comparten el poder col Partíu Conservador, del primer ministru David Cameron- podría remontase.
  
“Soñadores”
El líder del Partíu Lliberal Demócrata, el vizprimer ministru Nick Clegg, calificó de "soñadores" a los que s'oponen al aumentu del preciu de les matrícules y calcó en que nun s'avergoña d'apoyar estos planes. Pela so parte, el ministru d'Empreses, Vince Cable, dixo que namás Papá Noel podría satisfaer a los que piden polítiques cares y populares.
  
El líder del Partíu Llaborista, Ed Miliband, considera qu'esti xueves ye "el día del xuiciu" pa los lliberaldemócrates y encamentó-yos que cumplan les sos promeses electorales y voten en contra del encarecimientu de les matrícules.
  
"Antes de les elecciones, prometieron a les families y a los mozos que s'opondríen a cualquier subida nel preciu de les matrícules", recordó, antes d'añadir que "paez que munchos liberaldemócrates van incumplir esa promesa". "Solo con astenese nesta votación, van dexar que'l Gobiernu aumente'l preciu de les matrícules", dixo.
  
Pero delles concesiones d'última hora y supuestes ufiertes pa ocupar cargos nel Gobiernu nun llograron provocar una revuelta importante ente los lliberaldemócrates, según el Telegraph, y paez qu'hasta la metá de los 57 parlamentarios d'esti partíu podríen votar en contra.