El Bloque por Asturies pide respetu pa la llingua n’Uviéu

El Bloque por Asturies d’Uviéu criticó que la conceyala de cultura, Belén Fernández Acevedo, impusiera la emisión en castellanu del Concursu y muestra de Folclor Ciudá d’Uviéu, tres dos años emitiéndose n’asturianu.

Depués de más de dos años siendo de los programes más vistos de la TPA con más de 45.000 espectadores y un share de más del 10% nun horariu d’audiencia másima, la nueva conceyala de cultura d’Uviéu impuso que’l Concursu y Muestra de Folclor Ciudá d’Uviéu nun se pueda presentar n’asturianu.

“Bien mal empieza Belén Fernández Acevedo como responsable de cultura si lo primero que se-y ocurre ye machacar tovía más l’idioma tradicional de la capital”, criticó’l portavoz del Bloque por Asturies d’Uviéu, Nacho González.

Amás, el voceru nacionalista sorrayó qu’Uviéu ye ún de los conceyos del país con peor tratu a la llingua asturiana. “Nin s’oficializa nin se respeta la toponimia tradicional, nun hai un serviciu de normalización llingüística, nun hai nenguna rotulación n’asturianu nin presencia institucional”, indicó González.

Reconsiderar la decisión
Lo poco que se facía (pol asturianu n’Uviéu) y taba reconocío pola audiencia de toa Asturies quítase pol odiu y la mania contra la llingua asturiana”, criticó Nacho González dende’l Bloque por Asturies d’Uviéu. A lo último, González encamentó a la conceyala y l’alcalde d’Uviéu a reconsiderar la decisión y a la TPA a mediar nesti “despropósitu”.