Dos nuevos llargometraxes doblaos al asturianu estrénense n’avientu

“El tercer home”, de Carol Reed y “Los viaxes de Gulliver”, de Dave Fleischer; van ser los nuevos llargometraxes doblaos en llingua asturiana. Gonzali Producciones, responsable del proyectu, anuncia que se van estrenar n’avientu.

Según anunció Gonzali Producciones en nota de prensa, los dos llargometraxes van estrenase na segunda metada d’avientu. Nel doblaxe van participar actores asturianos y, como yá se pasara con “La nueche de los muertos vivientes”, el proyectu nun recibe nenguna subvención.

“El tercer home” (‘The Third Man’) ye una película del Reinu Uníu dirixida por Carol Reed, escrita por Graham Greene y protagonizada por Joseph Cotten y Orson Welles. Ta considerada la meyor obra fílmica británica de la historia.

“El tercer home” recibió'l Gran Premiu del Festival de Cannes y l'Óscar a la meyor fotografía en blanco y negro, na persona de Robert Krasker. La banda sonora, firmada por Antón Karas, ye una de les más famoses de tolos tiempos.

“Los viaxes de Gulliver”
“Los viaxes de Gulliver” (‘Gulliver's Travels’) foi el primer llargumetraxe d’animación producíu polos Estudios Paramount, y que tamién foi’l primer film d’esti xéneru que nun taba venceyáu a los Estudios Disney. La película dirixóla Dave Fleischer y producióla’l so hermanu Max Fleischer, dos piones del cine animáu que nos años cuarenta fueron mui populares polos sos curtiometraxes de “Superman”.

Los guionistes Dan Gordon, Cal Howard, Tedd Pierce, Edmond Seward y Izzy Sparber encargáronse de treslladar a la gran pantalla una parte de la novela de Jonathan Swif, centrada na aventura de Gulliver nel país de Lilliput. Los animadores emplegaron la técnica del rotoscoped en determinaes escenes, aportando un notable realismu al film, que tien una estupenda calidá d’animación y un bon tratamientu del collor.