El TSXA sentencia pola normalización llingüística na Universidá

El TSXA, a petición del Aconceyamientu de Xuristes pol Asturianu (AXA), baltió un alcuerdu del Conseyu de Gobiernu de la Universidá d’Uviéu que torgaba la presentación y recepción d’escritos n’asturianu nel so rexistru.

La sentencia del TSXA del pasáu 30 de payares anuló dellos párrafos de los artículos 2, 3 y 4 del Alcuerdu del Conseyu de Gobiernu de la Universidá d’Uviéu  nel que refugaben la presentación y recepción d’escritos n’asturianu na Universidá.

Según los maxistraos, les alministraciones públiques -ente elles la Universidá d’Uviéu- acordies a la Llei d’Usu y Promoción del Bable/Asturianu de 1998, tán obligaes a tramitar con normalidá los escritos que se-yos empobinen n’asturianu.

CUPA celebra la sentencia
Dende’l Conceyu Universitariu Pol Asturianu (CUPA) celebren la sentencia y feliciten a AXA por algamar “que’l reglamentu s’axuste al derechu”. Amás recuerden que yá avisaron nel so día al Rector de que’l reglamentu aprobáu pol Conseyu de Gobiernu de la Universidá d’Uviéu “nun s’axustaba a la Llei d’Usu del Asturianu”.

D’esti mou, el CUPA celebra que los tribunales “corrixan estes deficiencias” y pide equipu de Gobiernu de la Universidá qu’aplique de siguío la sentencia porque, en palabres del colectivu,“ tán en xuegu los derechos de los asturianos”.

Por último, el CUPA critica que’l Serviciu Xurídicu de la Universidá d’Uviéu ye ún de los elementos que más ta torgando la normalización del asturianu na Universidá. Amás sorrayen que lo faen “ensin razones xurídiques”.