XEGA reclama meyor educación afectivusexual pa evitar el VIH

Esti miércoles 1 d’avientu ye’l Día Mundial de Llucha contra’l Sida. Dende XEGA, colectivu asturianu de llesbianes, gais, tresexuales y bisexuales (LGTB), reclamen compromisu pa una educación afectivusexual “integral”.

Xente Gai Astur (XEGA) entiende que les instituciones públiques y la sociedá en xeneral tienen que comprometese nel accesu de la población a una educación afectivusexual integral.

Señalen amás, que l’esfuerzu “tien que ser mayor de cara a adolescentes y xóvenes LGTB”, por mor de que munches persones d’esta comunidá nun usen con vezu servicios sociales y/o sanitarios cuando se trata de temes afectivosexuales.

“Nun debemos escaecer que’l temor a la discriminación y la marxinación social tovía existentes na sociedá, nes instituciones sociales y sanitaries y nos profesionales de la salú, faen que munchos persones LGTB oculten la so orientación afectivosexual”, añade XEGA nesti sen.

Amás sorrayen qu’hai que baltiar está mentalidá discriminatoria –tamién nos servicios sanitarios- pa que se puea preguntar con naturalidá sobre temes de salú rellacionaos como la infección por VIH, Infecciones de Tresmisión Sexual (ITS) o’l sexu seguru.

Coles tresexuales
“Tampoco debemos escaecer la esclusión, la discriminación y la estigmatización social de les muyeres tresexuales trabayadores del sexu”, señala XEGA a la par que recalquen qu’esto “les fai abondo vulnerables frente al VIH”.

Pal colectivu asturianu LGTB hai que “garantizar y defender los derechos de les tresexuales, posibilitar la so inserción laboral, responder a les sos necesidaes sanitaries y reducir la so vulnerabilidá y riesgos frenti al VIH y otres ITS”.