El Garrapiellu, Carrillo y Rato, condecoraos pola ciudá de Xixón

El Conceyu de Xixón adelantó los títulos de fíu predilectu, adoctivu y les medalles d’Oru y de Plata que concede la ciudá. La Tertulia Cultural El Garrapiellu va llevase esti últimu títulu, mientres que Rato y Carrillo van ser nomaos fíos del conceyu.

El conceyal de Promoción Económica y Innovación, José María Pérez, adelantó esti martes que los trés Grupos Municipales -PSOE, PP y IU- acordaron nomar Fíu Predilectu de Xixón a Santiago Carrillo, pola so trayectoria política "más que dilatada".

Tamién propunxo a Rodrigo Rato pa que lu distingan como Fíu Adoptivu de la ciudá, dao que "pese a nacer en Madrid sigue vinculáu a Xixón, ciudá a la que sigue acudiendo y na que tien llazos familiares".

La Tertulia Cultural El Garrapiellu, dempués de venti años puxando pola llingua y cultura asturiana nel conceyu xixonés, tamién va ser condecorada cola Medalla de Plata de la ciudá.
 
Otres medalles
Pérez, en rueda prensa, señaló que tamién s'acordó conceder la Medalla d'Oru de la Villa al puertu y la comunidá portuaria de Xixón, mientres que les de Plata son pa: Francisco Prado Alberdi; la periodista María Teresa Álvarez -viuda de Sabino Fernández Campo-; José Manuel Menéndez Rozada, pola so trayectoria sindical; la Unidá d'Hospitalización a Casa del Hospital de Cabueñes;  la escritora Carmen Gómez Huella; y la yá citada Tertulia El Garrapiellu;.
  
L'acuerdu va llevase previsiblemente a Plenu'l próximu 20 d'avientu, pa que se refrende. Coles mesmes, Pérez recordó que l'actu d'entrega de les distinciones y honores va tener llugar el 29 de xunu, coincidiendo cola festividá de San Pedro, patrón de la ciudá.